6ª Etapa do Camiño Portugués + Como foi o Camiño

Compartimos a experiencia do Camiño

A modo pequena homenaxe do Camiño Portugués, realizaremos a súa última estapa, dende A Escravitude e O Milladoiro ata a Catedral de Santiago. 

Despois do xantar na Hospedería San Martín Pinario organizamos unha pequena charla-coloquio para poñer en valor a riqueza do patrimonio humano, cultural e de confraternización inherente á experiencia da peregrinación á catedral compostelá.

Contaremos coa presenza da “Asociación Galega de Amigos do Camiño de Santiago de Compostela” (AGACS), peregrinos que estean de paso e todos aqueles interesados nesta xuntaza. Durante esta conversa, escoitaremos testemuños reais e intercambiaremos coñecementos e aprendizaxe, que nos axudarán a comprender o verdadeiro significado do Camiño, de xeito que cada un atope a súa motivación individual para emprender tal aventura.

Pola súa parte, os membros de AGACS compartirán cos presentes a súa visita ao Consello Europeo de Bruxelas con motivo do aniversario dos trinta anos dende a declaración do Camiño de Santiago como primeiro Itinerario Cultural Europeo. Feito que resalta a importancia do Camiño como vía de comunicación e difusor cultural partícipe da identidade europea.